དབུས་འོས་བསྡུ་ལས་ཁང་གིས་རིང་མིན་མཆོད་འཇོར་ས་གནས་སུ་དངོས་གཞིའི་འོས་བསྡུ་བྱ་རྒྱུའི་ཐག་གཅོད་ཞུས་གནང་འདུག  ཉེ་ཆར་བཙན་བྱོལ་བོད་མིའི་སྔོན་འགྲོའི་འོས་བསྡུའི་སྐབས་བལ་ཡུལ་མཆོད་འཇོར་ཁུལ་ནས་འོས་བསྡུའི་སྒྲིག་གཞིར་འགལ་འཛོལ་ཚབས་ཆེ་བྱུང་བའི་ངོས་འཛིན་འོག དབུས་འོས་བསྡུ་ལས་ཁང་གིས་ས་གནས་དེར་དངོས་གཞི་འོས་བསྡུའི་ལས་རིམ་ཕྱིར་འཐེན་གནང་རྗེས། སྤྱི་ཚོགས་ནང་གནད་དོན་དེའི་ཐོག་སེམས་འཚབ་ཀྱིས་ལབ་གླེང་ཤུགས་ཆེ་བྱུང་བ་དང་ལྷག་པར་དུ་མཆོད་འཇོར་ས་གནས་མི་མང་གིས་ཡིག་ངག་གཉིས་ཐོག་ནས་རེ་སྐུལ་ནན་པོ་ཞུས་པར་བརྟེན། ཁ་ཉིན་ཕྱི་ཆེས་ ༡ ཉིན་གྱི་དབུས་འོས་བསྡུ་ལས་ཁང་གི་བཀོད་ཁྱབ་ལྟར། ཉེ་སྔོན་གྱི་ཐག་གཅོད་ཕྱིར་འཐེན་གནང་སྟེ་རིང་མིན་མཆོད་འཇོར་ས་གནས་སུ་དངོས་གཞིའི་འོས་བསྡུ་བྱ་རྒྱུའི་ཐག་གཅོད་ཞུས་གནང་འདུག  སྤྱིར་འདི་ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་སྐབས་བལ་ཡུལ་མཆོད་འཇོར་ཁུལ་གྱི་འོས་བསྡུ་ཚགས་ཚུད་མ་བྱུང་བའི་ལབ་གླེང་ཞུ་གཏུག་བྱུང་བ་ལྟར། དབུས་འོས་བསྡུ་ལས་ཁང་གིས་འབྲེལ་ཡོད་ལ་འདྲི་རྩད་དང་འོས་ཤོག་ལ་ཞིབ་འཇུག་གནང་བའི་བརྒྱུད། ཟླ་བ་ ༤ ཕྱི་ཚེས་ ༢༣ ཉིན་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཀྱི་མཚན་ཐོག་ཏུ་ཕྱག་ཡིག་ཞིག་བཏང་སྟེ། ཁུལ་དེར་འདི་ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་ཁྲོད། འོས་བསྡུའི་སྒྲིག་གཞིའི་དགོངས་དོན་མང་དག་ཅིག་ལ་འགལ་འཛོལ་ཚབས་ཆེ་བྱུང་ཡོད་པ་ར་འཕྲོད་བྱུང་བ་གཞིར་བཟུང་མཆོད་འཇོར་ས་ཁུལ་ཁྱབ་ཁོངས་སུ་ཚུད་པའི་མི་མང་ཡོངས་ལ་ཐེངས་འདིའི་དངོས་གཞིའི་འོས་བསྡུ་ནང་ཆ་ཤས་བླང་རྒྱུའི་ཐོབ་ཐང་ཕྱིར་འཐེན་ཞུ་རྒྱུའི་ཐག་གཅོད་གནང་ཡོད་པ་རེད། དབུས་འོས་བསྡུ་ལས་ཁང་གི་ཐག་གཅོད་དེ་ཕྱིར་བསྒྲགས་བྱུང་མ་དག་སྤྱི་ཚོགས་དྲྭ་ལམ་ཐོག་བོད་མི་མང་དག་ཅིག་ནས་གནད་དོན་དེའི་ཐོག་ཐུགས་འཚབ་ཀྱིས་ལབ་གླེང་ཤུགས་ཆེ་ཡོང་ཡོད་པ་དང་། ལྷག་པར་ས་གནས་ཀྱི་མང་ཚོགས་ནས་སྤྱི་ཚོགས་དྲྭ་ལམ་ཁྲོད་དབུས་འོས་བསྡུའི་ལས་ཁང་གི་ཐག་ཆོད་དེར་ངོས་ལེན་རྩ་བ་ནས་མེད་པ་འགྲེལ་བརྗོད་ཀྱིས། འོས་ཀྱི་ཐོབ་ཐང་བཙན་འཕྲོག་བྱས་པ་དེ་ནི་བ་ཤེ་གླང་འགེལ་གྱི་ནོར་འཁྲུལ་ཚབས་ཆེན་ཞིག་ཡིན་པ་དང་། མང་གཙོའི་ཁེ་དབང་རྡོག་རོལ་ཤུགས་ཆེ་བཏང་བ་ཞིག་ཡིན་སྐོར་བརྗོད་པ་མ་ཟད། སྔོན་འགྲོའི་འོས་བསྡུའི་ནང་སྒྲིག་འགལ་བྱུང་ཡོད་ན་ཁུལ་དེའི་འོས་བསྡུའི་འགན་འཁུར་མི་སྣ་དང་ཟུར་དཔང་སོགས་ལ་ཁྲིམས་མཐུན་ཉེས་པ་གཏོང་དགོས་པ་ལས་ཉེས་མེད་སྐྱ་སེར་མང་པོའི་ཁེ་དབང་འཕྲོག་པ་ནི་གནད་དོན་ཆུང་ཆུང་ཞིག་རྩ་བ་མིན་པ་གསུང་མཁན་བྱུང་ཡོད།  འདི་ག་རླུང་འཕྲིན་ཁང་གིས་དབུས་འོས་བསྡུའི་འགན་འཛིན་མཆོག་ལ་གནད་དོན་དེའི་ཐོག་བཅར་འདྲི་ཞུ་ཆེད་འབྲེལ་བ་རིམ་པ་བྱས་ཡིན་པ་དེ་ལྟར་ཡང་། འགན་འཛིན་མཆོག་ནས་དེའི་སྐོར་དངོས་གཞིའི་འོས་བསྡུ་གྲུབ་ཟིན་རྗེས་མ་གཏོགས་བཅར་འདྲི་དང་ལེན་གནང་གི་མིན་པ་གསུངས་ཡོད་པ་དང་ལྷག་པར་དུ་ཟླ་ ༤ ཚེས་ ༢༦ དངོས་གཞིའི་འོས་བསྡུའི་ལས་རིམ་འགོ་འཛུགས་སྐབས་གསར་འགོད་པས་བལ་ཡུལ་མཆོད་འཇོར་ས་གནས་ཀྱི་གནད་དོན་སྐོར་བཀའ་འདྲི་ཞུ་སྐབས་དབུས་འོས་བསྡུའི་འགན་འཛིན་མཆོག་ནས། དབུས་འོས་བསྡུའི་ལས་ཁང་ལ་བཅའ་ཁྲིམས་དང་འོས་བསྡུའི་སྒྲིག་གཞིའི་ཐོག་ནས་བཙན་བྱོལ་སྤྱི་ཚོགས་ནང་འོས་བསྡུ་དེ་བཞིན་རང་དབང་དང་དྲང་བདེན་ཁྲིམས་མཐུན་གྱི་སྒོ་ནས་ལག་བསྟར་ཐད་འགན་བཞེས་དགོས་པའི་ལམ་སྟོན་ཡོད་པ་ལྟར་ཐག་ཆོད་དེ་ཁྲིམས་མཐུན་གྱི་སྒོ་ནས་གནང་ཡིན་ཅེས་དང་། དེ་འབྲེལ་ལན་འདེབས་གསལ་བཤད་རིགས་དགོས་མཁོ་འབྱུང་ཚེ་དངོས་གཞིའི་འོས་བསྡུའི་ལས་རིམ་མཇུག་སྒྲིལ་རྗེས་གནང་གི་ཡིན་ཅེས་གསུངས་ཡོད་པ་རེད། དེ་བཞིན་འདི་ག་རླུང་འཕྲིན་ཁང་གིས་གནད་དོན་དེའི་སྐོར་འབྲེལ་ཡོད་བལ་ཡུལ་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཕུར་བུ་ལགས་སུའང་ཞལ་པར་བརྒྱུད་བཀའ་འདྲི་ཞུ་སྐབས་ཁོང་གིས།  གནད་དོན་དེའི་བྱུང་རིམ་དང་ད་ལྟའི་གནས་སྟངས་འགྲེལ་བརྗོད་དང་འབྲེལ།  གང་ལྟར་ཡང་དབུས་འོས་བསྡུ་ལས་ཁང་ངོས་ནས་ཕྱག་ཡིག་དེའི་ནང་ཁོང་གིས་གནོན་ཤུགས་དང་སུན་གཙེར། དེ་བཞིན་འཇིགས་སྐུལ་བྱས་ཡོད་པ་སོགས་ཀྱི་ཐ་སྙད་བེད་སྤྱོད་གནང་ཡོད་པ་དེར་བློ་ཕམ་བྱུང་ཅེས་དང་།  བལ་ཡུལ་དུ་རྒྱ་ནག་གི་གནོན་ཤུགས་དང་ཡུལ་དེའི་ཆབ་སྲིད་ཀྱི་གནས་སྟངས་ཚང་མས་མཁྱེན་གསལ་ཡིན་སྐོར་གསུངས་ཏེ།  དེ་འབྲེལ་གཞུང་འབྲེལ་གྱི་ཐོག་ནས་ལན་འདེབས་གསལ་བཤད་ཀྱི་གོ་སྐབས་འབྱུང་ཚེ་དེ་ལྟར་ཞུ་ཡི་ཡིན་ཅེས་དང་། ད་ལྟ་ཁོང་གིས་བརྒྱུད་ལམ་འདིའི་བརྒྱུད་གནད་དོན་དེའི་ཐོག་གང་ཞུས་པ་དེ་དག་ཁོང་སྒེར་གྱི་སེམས་ཚོར་ཐོག་ནས་ཞུ་ཡི་ཡོད་པ་ལས་བལ་ཡུལ་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཡིན་པའི་ཆ་ནས་བརྗོད་ཀྱིས་མེད་ཅེས་གསུངས་ཡོད་པ་རེད།  རྩ་བའི་བལ་ཡུལ་མཆོད་འཇོར་འོས་བསྡུ་ལས་ཁང་གི་ཁྱབ་ཁོངས་སུ་ Boudha མཆོད་རྟེན་ཁུལ་དང་འཇོར་པ་ཀྲི་ས་གནས་འཁེལ་གྱི་ཡོད་པ་དང་། དེའི་ཁྱབ་ཁོངས་དགོན་སྡེ་མང་དག་ཅིག་ཡོད་པ་མ་ཟད། ཐེངས་འདིའི་འོས་བསྡུའི་ནང་ས་གནས་དེ་དག་ལས་དེབ་སྐྱེལ་བྱེད་མཁན་གྱི་གྲངས་འབོར་ ༢༠༠༠ ཙམ་ཡོད་པ་རེད།

The post མཆོད་འཇོར་ས་གནས་སུ་དངོས་གཞིའི་འོས་བསྡུ་བྱ་རྒྱུའི་ཐག་གཅོད་ཞུས་པ།  appeared first on vot.