ཕྱི་ལོ་ ༢༠༢༦ ནས་ ༢༠༣༡ བར་གྱི་བོད་ཀྱི་མ་འོངས་འགན་སྲུང་གི་ཡིག་ཆ། བོད་མིའི་སྒྲིག་འཛུགས་བཀའ་ཤག་སྐབས་ ༡༧ པས་བོད་ཀྱི་མ་འོངས་འགན་སྲུང་ཞེས་པའི་ཕུགས་དམིགས་ཡིག་ཆར་བོད་དོན་དང་འབྲེལ་བའི་རྒྱ་ནག་གཞུང་གི་སྲིད་བྱུས་དང་། བོད་མིའི་སྒྲིག་འཛུགས་ཀྱི་ལང་ཕྱོགས། སྲི་ཞུའི་ལས་བྱེད་རྣམས་ཀྱི་བྱེད་སྒོ་ཁག་ཅིག་ཁ་སྣོན་དང་བསྐྱར་ཞིབ་གནང་སྟེ། དེ་རིང་ཕྱི་ཟླ་ ༩ ཚེས་ ༣༠ ཉིན་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ཚང་འཛོམས་ཐོག་ངོ་སྤྲོད་གནང་སོང་། རྩ་བའི་བོད་ཀྱི་མ་འོངས་འགན་སྲུང་གི་ཡིག་ཆ་འདི་ནི་ཕྱི་ལོ་ ༢༠༢༦ ནས་ ༢༠༣༡ བར་གྱི་ཡིག་ཆ་ཞིག་ཡིན་པ་དང་། ཕུགས་དམིགས་ཡིག་ཆ་དེའི་ནང་བོད་ཀྱི་གལ་གནད་སྐོར་དང་། རྒྱ་དམར་གཞུང་གི་མཐར་ལྷུང་སྲིད་བྱུས། བོད་རྒྱ་ཐུན་མོང་གི་མདུན་ལམ། བོད་རྒྱ་འབྲེལ་འཛུགས་ཀྱི་བརྒྱུད་རིམ། བོད་དོན་བདེན་མཐའ་གསལ་ཐབས་ཀྱི་གཞི་རིམ་བྱེད་སྒོ། བོད་མིའི་ངོ་བོ་སྲུང་སྐྱོབ་དང་འཚོ་གནས་གོང་སྤེལ་སོགས་གནད་དོན་མང་དག་ཅིག་གསལ་སྟོན་གནང་འདུག དེར་བརྟེན་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་གཙོ་བྱས་པའི་སྲི་ཞུའི་ལས་བྱེད་ཡོངས་ནས་ལྟ་ཀློག་དང་ཤེས་རྟོགས་བྱེད་རྒྱུ་ཤིན་ཏུ་གལ་ཆེན་པོ་ཡིན་པ་ཡང་གསུངས་སོང་།།